Bashkimi e ka fituar Kupën e Kosovës në basketboll në konkurrencën e femrave, duke mundur në finale Mabetex Prishtinën me rezultat 84:66 (14:18, 26:18, 21:15, 23:15).
Çereku i parë ishte i baraspeshuar me një epërsi të lehtë të vashave prishtinase, që e fituan këtë pjesë 14:18.
Prishtina e nisi më mirë periudhën e dytë, duke pasur epërsi në shtatë pikë, 20:27, por Bashkimi këndellet dhe arrin të barazojë rezultatin e të krijojë epërsi prej katër pikësh 37:33, derisa skuadrat shkuan në pushim me rezultat 40:36.
Vashat prizrenase thelluan epërsinë edhe më shumë në periodën e tretë, 48:40, e më pas edhe 54:42 dhe 59:46, derisa rezultati në semafor pas 30 minutash tregonte shifrat 61:51.
Bashkimi vazhdoi me lojë të mirë edhe në 10 minutat e fundit, duke i fituar 23:15, duke triumfuar në fund me rezultat 84:66.
Te Bashkimi u dalluan Saranda Daci me 22 pikë e 10 kërcime, Khadija Broën me 27 pikë e 11 kërcime dhe Arbnore Përquku me 16 pikë e nëntë kërcime, derisa te Mabetex Prishtina u dalluan Era Shatri dhe Irma Konjusha me nga 15 pikë.
MVP është shpallur Saranda Daci. Medaljet i kanë shpërndarë Arben Fetahu, kryetar i FBK-së, Vlora Dumoshi, ministre e Kulturës, Rinisë dhe Sportit (MKRS) e Ibër Alaj, drejtor i Departamentit të Sportit.
Kupën kapitenes së Bashkimit ia dorëzuan Elvira Dushku, Sekretare e Përgjithshme e FBK-së dhe Vlora Dumoshi, ministre e MKRS.
