Telegrafi

Bashkimi dhe Peja të shtunën me ‘roster’ të vjetër zhvillojnë ndeshjen e mbetur nga vjeshta

Bashkimi do të pret Pejën në një nga duelet më interesante të javës në Prizren.

Palestra “Rexhai Surroi” pritet të jetë e stërmbushur në duelin e të shtunës ku skuadra vendase ka nevojë për tifozët.

Kjo pasi që vendasit do të jenë të hendikepuar me shumë pak lojtarë në dispozicion, kjo pasi që ndeshja e shtyrë nga stinori vjeshtor zhvillohet tash dhe Bashkimi s’mund të llogarisë në përforcimet e bëra në janar.

Kështu, në shprehje pritet të vijnë lojtarët vendorë si Qëndrim Biraj, Arion Balluku dhe të tjerë, ndaj një Peje të fuqishme që do të ketë në dispozicion yje si Alban Veseli dhe Cameron Rundles.

Peja është favorite e madhe për këtë ndeshje, por nëse Bashkimi fiton këtë duel dhe duelin tjetër që pritet të zhvillohet i vlefshëm për këtë javë të stinorit pranveror, e që zhvillohet në mesjavë, atëherë prizrenasit shumë lehtë mund ta shohin veten në pozitën e parë në tabelë vetëm një javë pasi mezi mposhtën KB Rahovecin pas vazhdimeve.

Kjo javë pritet të jetë ndër javët vendimtare për pozitat tabelare në Superligë që ende mbesin të pa qarta duke parë që skuadra si Ylli dhe Rahoveci janë në gjendje të shkaktojnë befasi ndaj katërshes së madhe në secilin moment.

/Telegrafi/