Kryetari i PD-së, Lulzim Basha, sonte ka ripërsëritur kërkesën për lirimin e personave të arrestuar nga policia në Kukës për protestën e së shtunës, ndërsa akuzoi kryeministrin Edi Rama duke thënë se ai është një plaçkitës.
Basha tha se ndalimi i qytetarëve që protestuan kundër tarifës për Rrugën e Kombit është antikushtetues, duke tërhequr vërejtjen se parësore për Prokurorinë nuk duhet të jenë qytetarët hallexhinj, por krimi i organizuar.
“Janë rrëmbyer në mes të natës, pa paraqitur asnjë urdhër ndalimi, asnjë urdhër arresti dhe janë sjellë në Tiranë. Kjo përbën një vepër të rëndë penale të heqjes së paligjshme të lirisë. Këshilltarët kanë kallëzuar për këtë policinë dhe Prokurorinë e Kukësit. S’do të tërhiqemi deri kur ata që janë përgjegjës të japin llogari”, tha ai.
Basha nuk ka kursyer nga akuzat kryeministrin Edi Rama duke e quajtur atë si një plaçkitës.
“Rama po lufton për paratë e korrupsionit që po mbush xhepat e tij dhe të bandës së tij. Rama është një plaçkitës dhe populli do t’i tregojë se ku e kanë vendin plaçkitësit”, tha ai.