Barcelona merr një fitore komode ndaj Real Sociedadit

Barcelona ka fituar me rezultat 2-0 ndaj Real Sociedadit në kuadër të javës së 35-të në elitën e futbollit spanjoll.

Ndeshja nisi me një ritëm të ngadaltë me Barcelonën që mbante posedimin e topit, por pa arritur të krijojë ndonjë rast serioz për gol.

Rasti i parë në këtë takim i takoi vendasve të cilët rrezikuan përmes Sheraldo Becker (5’) goditja e të cilit shkoi mbi portë.

Raphinha pati një mundësi të artë shënimi në minutën e 38-të, por gjuajtja e tij u ndal nga shtylla.

Golin e epërsisë dhe të fitores Barcelona e gjeti në minutën e 40-të me anë të Lamine Yamal i cili tregoi një teknikë të jashtëzakonshme për ta finalizuar aksionin për 1-0.

Në pjesën e dytë Barcelona pati një tjetër mundësi për ta dyfishuar epërsinë përsëri me Raphinhan, por gjuajtjen e tij të fortë e priti me shumë mund Alex Remiro.

Mysafirët patën një mundësi të artë për të barazuar shifrat përmes Brais Mendes (67’) por gjuajtja e tij shkoi fare pranë shtyllës së Ter Stegen.

Deri në fund Barcelona e gjeti edhe golin e dytë kësaj radhe me anë të Raphinhas i cili shënoi nga pika e bardhë e penalltisë për rezultatin 2-0 në minutën e 93-të.

Me këtë fitore Barcelona shkon në kuotën e 76 pikëve dhe vazhdon garën për të mbajtur pozitën e dytë në tabelë dhe ndiqet nga Girona në vendin e tretë me një pikë më pak (75)./Telegrafi/