Të dielën zhvillohet derbi i xhiros së 23-të në BKT Superligën e Kosovës në futboll, ndërmjet Ballkanit dhe Llapit.
Dy skuadrat janë në garë për titullin e kampionit, me Ballkanin që zë vendin e parë në tabelë me 45 pikë, derisa Llapi zë vendin e katërt me gjashtë pikë më pak.
Të dielën në stadiumin e qytetit në Suharekë dy skuadrat përballen mes vete në një ndeshje që pritet të jetë e zjarrtë.
Kapiteni i Ballkanit, mesfushori Edvin Kuç, flet para ndeshjes së rëndësishme duke thënë se janë favorit pasi luajnë në shtëpi të tyre.
“Luajmë në Suharekë dhe jemi në rolin e favoritit, por futbolli nuk ka garanci, një gjë është e sigurt që unë dhe bashkëlojtarët do japim maksimumin për të fituar dhe për të fituar të dielën”, tha Kuç, për TV Dukagjinin.
Edhe mesfushori tjetër i suharekasve, Kushtrim Gashi flet para duelit të vështirë me Llapin.
”Kemi përgatitur gjatë javës të gjitha ato pikat e forta dhe pikat e dobëta që ka skuadra e Llapit, dhe mendoj se do ti qasemi ndeshjes me shumë seriozitet”, tha Gashi.
Për duelin e së dielës foli edhe kryetrajneri i Llapit, Tahir Batatina, duke thënë se se pret që të jetë një takim i bukur.
“Mendoj se do të jetë një ndeshje jo e lehtë për Llapin, një ndeshje e vështirë, duke e ditur që të dy skuadrat janë në një formë të mirë, edhe Ballkani e ka filluar këtë stinor pa humbje, ashtu sikurse edhe Llapi. Besoj se do të jetë një lojë e bukur për shikuesit”, tha fillimisht ai.
Batatina ishte kritik për fushën në Suharekë, pasiqë ka tapetin artificial, teksa edhe krahasoi ekipin e tij me atë të Barcelonës.
“Kam thënë që kur të rikthehen Llapi dhe Barcelona do ta thonë fjalën kryesore”, tha Batatina.
Edhe dyshja e Llapit, Bujar Idrizi dhe Valmir Veliu u prononcuan për ndeshjen ndaj Ballkanit.
“Për këtë ndeshje shpresojmë të shkojmë dhe të arrijmë një rezultat pozitiv. Shpresojmë të kemi këtë ecuri të rezultateve, ne nuk i frikësohemi askujt dhe shkojmë për rezultat pozitiv”, tha Idrizi.
Optimist para ndeshjes ishte edhe ylli i skuadrës llapjane, sulmuesi Valmir Veliu.
“Siç dihet Ballkani ka një seri të mirë, është në formë të mirë, por ne do të luftojmë, do të shkojmë për një rezultat pozitiv dhe shpresoj që t’ia arrijmë”, tha Veliu. /Telegrafi
