Edhe këtë vit producentët më të suksesshëm të kinemasë evropiane të viteve të fundit do të jenë prezentë në ngjarjen më unike në skenën ballkanike të filmit që organizohet në Tiranë.
Për pesë ditë me radhë ”Balkan Film Market” do shërbejë si një platformë për të sjellë më pranë profesionistë të botës së filmit për të ndarë historitë, për të nxitur marrëdhëniet profesionale dhe për të zhvilluar edhe më tej përpjekjet marketing për prodhimet vendore kinematografike.
”Balkan Film Market” do mbledhë për të dytin vit producentë dhe kineastë nga gjithë Ballkani të cilët po mësojnë si të vendosin kontaktet e duhura dhe te orientohen për gjetjen e bashkëproducentëve si çelësi kryesor për të patur akses në fondet evropiane të filmit.
Në BFM do të jenë të pranishme një shumëllojshmëri alternativash edukative, pa harruar diskutimin e paneleve mbi problematikën e industrisë së filmit në Ballkan dhe mundësitë për të rritur përpjekjet për bashkëprodhim dhe për t’i konkretizuar ato në projekte konkrete.