Ekspertët e futbollit parashikojnë se Gareth Bale do të rezultojë i suksesshëm te skuadra e Tottenham Hotspur.
Uellsiani është kthyer te Spursat në formë huazimi njëvjeçar, shtatë vite pasi ishte larguar drejt Real Madridit. Tashmë është konfirmuar se ai do ta bartë fanellën me numrin 9 te klubi anglez.
Në vitet e fundit, anësori ka pasur probleme me formën e tij, të cilën ia kishin kufizuar edhe lëndimet fizike.
Mirëpo, me kthimin në klubin ku u bë i popullarizuar, pritet rikthimi në formë i 31-vjeçarit që pritet të ndërtojë një fazë ofensive të frikshme.
Jose Mourinho tashmë i ka në dispozicion Son Heung-min dhe Harry Kane, dhe kur atyre do t’u bashkëngjitet Bale, sulmi i Spursave do të jetë në një dimension tjetër.
“Duket joshëse – Kane, Son dhe Bale. Kanë shumë lojtarë të mirë te Tottenhami. Mezi pres të shoh si do të shkojë”, citon The Sun fjalët e trajnerit të Uellsit, Ryan Giggs. /Telegrafi/