Historiani Hakif Bajrami ka thënë Rusia kishte marrë detyrë të krijonte “Bullgarinë e Madhe” ndërsa Austria kishte marrë detyrë të krijonte “Serbinë e Madhe”.
“Rusia dhe Austro-Hungaria në vitin 1877 kishin bërë marrëveshje sekrete në Budapest për të shkatërruar Perandorinë Osmane. Ato i kishin ndarë detyrat që Rusia të krijonte “Bullgarinë e Madhe” ndërsa Vjena kishte marrë detyrë të krijonte “Serbinë e Madhe” pa bregdetin, sepse atë e kishte lënë për vete. Shqiptarët askund nuk përmenden. Kosova, Manastiri e deri në Selanik i merrte Serbia”, thotë historiani.
Bajrami në emisionin “Debat Plus” me Ermal Pandurin në RTV Dukagjini ka thënë se lufta ballkanike nuk ishte luftë anti-turke sepse në atë luftë vriteshin vetëm shqiptarët.
“Në luftërat ballkanike vritej çdokush që shihej me plis në kokë”, tha ai, përcjell Telegrafi.
Sipas historianit marrëveshja e Germainit thoshte se ata popuj që janë okupuar nga Serbia para vitit 1913 nuk do të kishin të drejta.
Bajrami thotë se Rusia në vitin 1916 u dha ultimatum Francës dhe Anglisë që të ndihmonte ushtritë e lodhura serbe në Durrës.
“Historianët serbë e pranojnë vet, se ushtria serbe gjatë kalimit në Shqipëri kishte vrarë edhe barinjtë”.
Historiani thotë se çështja shqiptare ishte e shtuar edhe në Lidhjen e Kombeve, por e penguan disa shtete të rëndësishme.
“Duhet thënë troç, në momentin kur “bima shqiptare” po dilte në sipërfaqe të tokës atë e këputen shtete të rëndësishme përfshirë Anglinë dhe Francën”, tha Hakif Bajrami./Telegrafi
