Një burrë ka vdekur pasi u godit nga një dem para gruas dhe njërës prej dy vajzave të tij në një festival spanjoll.
Sipas mediave të huaja, përcjell Telegrafi, Oscar Rodriguez Calleja, 50 vjeç, u dërgua me urgjencë në spital pasi u godit nga një dem i quajtur Rodillero në festivalin Fiesta del Verdejo në qytetin e vogël të La Seca, Valladolid, në veri të Spanjës, por mjekët nuk arritën ta shpëtonin.
Pamjet e incidentit që ndodhi të dielën më 1 maj treguan momentet përpara se demi të dilte nga “kutia” e tij prej druri, duke marrë menjëherë një kthesë djathtas drejt turmave që qëndronin pas barrierave.
Babai i dy fëmijëve u “kap” më pas nga brirët e demit teksa qëndronte pas kangjellave, ku më pas u tërhoq zvarrë për disa sekonda – ndërsa dëshmitarët e shikonin të shokuar.
Të dashurit e tij pësuan sulme paniku dhe u trajtuan në vendngjarje përpara se gruaja e tij të dërgohej në një qendër shëndetësore.
Oscar kishte udhëtuar nga shtëpia e tij në komunën e afërt të Nava del Rey për të marrë pjesë në festimet me familjen e tij. /Telegrafi/
