Vitin e kaluar u njoftua se punimet do të zgjasnin deri në pranverën e vitit 2010, ndërsa afati i ri i njoftuar nga "Enka" është qershori i vitit të ardhshëm. Ecuria e punimeve në këtë zonë varet veçanërisht nga kushtet klimaterike gjatë dimrit.
Në tunelin e Thirrës, që është edhe pjesa më e vështirë dhe më komplekse e punimeve, gjatë dimrit temperaturat zbresin nën zero dhe dëbora vijon për shumë muaj. Një nga faktorët e zgjatjes së punimeve vlerësohet se ka qenë edhe nxitimi i qeverisë për ta hapur rrugën për trafik para zgjedhjeve të 28 qershorit. Konsorciumi sipërmarrës "Bechtel-Enka" ka punuar njëzet e katër orë në ditë në të dyja tunelet deri para qershorit, kur hapja e pjesshme e rrugës për trafik i ngadalësoi punimet.
Aktualisht punimet janë përqendruar në tunelin e Thirrës, ndërsa pjesa tjetër e rrugës pothuajse ka përfunduar tërësisht. Edhe 30 urat kanë përfunduar pothuajse tërësisht.