Pjesë të Australisë perëndimore po kërcënohen nga një valë “ekstreme” e të nxehtit, duke rritur rrezikun e zjarreve në të gjithë shtetin e gjerë.
Byroja e Meteorologjisë lëshoi sot një “paralajmërim për nxehtësinë ekstreme” për rajonet e largëta Pilbara dhe Gascoyne të shtetit më të madh të Australisë, duke paralajmëruar se temperaturat atje mund të arrijnë në 40 gradë gjatë fundjavës.
Në qytetin minerar Pilbara të Paraburdoo, rreth 1500 km në veri të kryeqytetit Perth, një temperaturë maksimale prej 47 gradë Celsius u parashikua të shtunën, më shumë se gjashtë gradë mbi maksimumin mesatar për janarin, raporton reuters.
Moti i nxehtë rrit rrezikun e zjarreve në një sezon tashmë me rrezik të lartë mes fenomenit të motit “El Nino”, i cili zakonisht shoqërohet me ngjarje ekstreme të motit si zjarret, ciklonet dhe thatësirat.
Paralajmërimi vjen pasi qindra zjarrfikës luftuan me një zjarr të furishëm pranë Perthit mes temperaturave të larta në fillim të këtij muaji, duke shkaktuar evakuime.
Dy sezonet e fundit të zjarreve në Australi kanë qenë të buta në krahasim me “verën e zezë” të zjarreve 2019-2020. që shkatërroi një zonë sa Turqia, vrau 33 njerëz, tre miliardë kafshë dhe triliona jovertebrorë. /Telegrafi/