Një helikopter që transportonte presidentin iranian Ebrahim Raisi është dashur të bëjë një “ulje të vështirë” pasi ka pasur vështirësi, raportojnë mediat shtetërore.
Detajet e asaj që ndodhi mbeten të paqarta, por ja një vështrim rreth atyre që dimë deri më tani:
Sipas mediave lokale, përcjell Telegrafi, Raisi po shkonte për në qytetin e Tabrizit, në veriperëndim të Iranit, pasi u kthye nga kufiri me Azerbajxhanin, ku hapi digat Qiz Qalasi dhe Khodaafarin.
Veç kësaj, sipas raportimeve të mediave, përcjell Telegrafi, helikopteri ishte një nga tre që udhëtonin në një kolonë.
Ministri i Brendshëm i Iranit thotë se ekipet e shpëtimit janë ende duke u përpjekur për të arritur në vendin e “aksidentit”, por përpjekjet e tyre po pengohen nga kushtet e këqija të motit.
Ndërkohë një gazetar i agjencisë së lajmeve Fars thotë se dukshmëria në zonën malore dhe të pyllëzuar ishte vetëm rreth pesë metra. Zona është rreth 50 km në veri të Tabrizit.
Ndërsa Ahmad Alirezabeigi, një deputet iranian për qytetin e Tabrizit, thotë se punonjësit e shpëtimit emergjent nuk e kanë gjetur ende vendndodhjen e helikopterit që mbante presidentin.
Sipas tij, dy helikopterë të tjerë në kolonë u ulën të sigurt. /Telegrafi/