Gjykata e Posaçme e Apelit konfirmoi dënimin me burgim të përjetshëm për Redjan Rrajën, i fajësuar nga Shkalla e Parë për atentatin ndaj prokurorit Arjan Ndoja nëntorin e vitit 2019.
Në ngjarjen e ndodhur në segmentin Durrës-Tiranë pranë rrethrrotullimit të Shkozetit u plagos prokurori dhe Aleksandër Laho, i njohur si Rrumi i Shijakut, si edhe shoferi Andi Maloku, që ndërroi jetë më pas në spital.
Apeli i Posaçëm e vlerësoi të drejtë dënimin e dhënë ndaj Rrajës, pasi u fajësuar për “vrasje të funksionarëve publike”, mbetur në tentativë, “vrasje në rrethana cilësuese”, “grup të strukturuar kriminal” dhe “armëmbajtje pa leje”.
Të pandryshuar Apeli la edhe dënimin me 35 vjet burg për të bashkëpandehurin e Rrajës, Ariol Halilajn. Sipas hetimit të SPAK, Redjan Rraja ka qenë pjesë e grupit të atentatorëve ndaj prokurorit Ndoja.
Mes provave të SPAK kundër tij, ishin gjurmët ADN-je të të pandehurit në një automjet të braktisur në Shkafane të Durrësit, ku ishin edhe armët e përdorura në atentat. Ndërsa i pandehuri Halilaj ka ndihmuar Rrajën të largohet nga ky vend. Por teksa Rraja dhe Halilaj kishin kaluar në gjykim për ngjarjen, SPAK identifikoi bashkëpunëtorët e tyre.
Sipas Prokurorisë së Posaçme, në atentatin e 1 nëntorit 2019 kanë marrë pjesë Plaurent Dervishaj, Julian Meçaj, Bledar Polovina dhe Amar Shkëmbi, i njohur edhe me emrin Dritan, të gjithë të shpallur në kërkim.