Oficeri i policisë në Minneapolis, Derek Chauvin, është arrestuar lidhur me vdekjen e George Floyd, katër ditë pasi u shfaq në video duke i vendosur 46-vjeçarit gjurin në qafë, ndërkaq veprimi i tij ka ngjallur protesta të dhunshme në të gjithë vendin.
Sipas mediave të huaja, përcjell Telegrafi, Komisioneri i Sigurisë Publike, John Harrington, ka bërë të ditur se polici 44-vjeçar u arrestua të premten nga hetuesit e shtetit.
Chauvin ishte një nga katër oficerët që u pushuan nga puna për shkak të vdekjes së Floyd, ndërsa nuk është bërë ende e ditur nëse janë arrestuar edhe tre policët e tjerë.
Arrestimi i Chauvin vjen pas trazirave të shkaktuara në të gjithë Minneapolis – dhe në disa shtete – pasi protestuesit kanë kërkuar drejtësi për 46-vjeçarin Floyd.
