Policia e Kosovës njofton se sot ka arrestuar një zyrtar të gjendjes civile në Komunën e Prishtinës, pasi dyshohet për veprat penale ‘keqpërdorimi i pozitës apo autoritetit zyrtar’ dhe ‘falsifikim i dokumentit’.
Në njoftim bëhet e ditur se i arrestuari është zyrtari me inicialet R.M., 64-vjeçar.
“Hetuesit policorë nga Drejtoria për Hetimin e Krimeve Ekonomike dhe Korrupsionit- Sektori për Hetimin e Krimeve Ekonomike, pas hetimeve paraprake, sot më 05.07.2022 kanë arrestuar të dyshuarin R.M., (viti i lindjes 1958, mashkull kosovar), zyrtar i gjendjes civile në Komunën e Prishtinës (ofiqar i Zyrës Lokale në Dardani)”.
“I dyshuari ka kryer veprat penale ‘keqpërdorimi i pozitës apo autoritetit zyrtar’ dhe ‘falsifikim i dokumentit’”, thuhet në njoftimin për media.
Tutje, thuhet se i dyshuari ka regjistruar persona pa bërë verifikimin se a plotësohen kriteret për regjistrim duke bërë që disa nga të regjistruarit të krijojnë identitet të dyfishtë (identitet të Kosovës dhe të një shteti fqinj).
“Gjatë kontrollit janë gjetur dhe në cilësi të provave materiale janë sekuestruar përkohësisht: një telefon celular; 60 fishekë të kalibrit 7.62 mm; një karikator i armës; dokumente të ndryshme, certifikata, vërtetime të regjistrimit, foto të librave amzë dhe dokumente të tjera të personave të ndryshëm”, thuhet tutje në njoftim.
Me aktvendim të prokurorit të shtetit, të dyshuarit i caktohet masa e ndalimit prej 48 orëve dhe dërgohet në qendrën e mbajtjes. /Telegrafi/