Një shqiptar i ekstraduar 5 vite më parë, i dënuar me 15 vjet burg në Shqipëri ka mundur të hyjë sërish në Britaninë e Madhe. Ardian Rragami, 45 vjeç, hyri në Angli me një pasaportë kosovare në vitin 1998, pasi kishte vrarë një person në vendlindjen e tij, në Shkodër.
Në Shqipëri, Gjykata e Shkodrës e kishte dënuar me 15 vjet burg për vrasjen e shtetasit Qemal Kola, pas një sherri banal në një lokal. Në shtator të vitit 2009 ai u ekstradua dhe iu dorëzua drejtorisë së burgjeve në Rinas.
Nën emrin Ardian Gashi, kishte përfituar azil në Angli dhe punonte në një firmë ndërtimi në Eseks, ku u zbulua nga Interpoli.
Pasi përfitoi ulje dënimi në Apel, ai u bashkua me familjen e tij në Hertfordshire në vitin 2014. Mediat britanike po e ndjekin rastin e tij, pasi vlerësojnë se Anglia është kthyer në strehën e vrasësve shqiptarë.
Zyra e Punëve të Brendshme në Britaninë e Madhe bën të ditur për gazetës “Daily Mail” se ai është ndaluar dhe se po ndiqeshin procedurat për ta dëbuar sërish Rragamin, për shkak të “dënimit të tij”.