Policia e Shtetit ka arrestuar dy persona, babë e djalë të cilët përgatisnin përzierje të vajrave të ndryshme, ndërsa i shisnin si vaj ulliri bio.
Gjatë operacionit u arrestua në flagrancë shtetasi A. A., 56 vjeç, si dhe u shpall në kërkim djali i tij shtetasi D. A, 29 vjeç, të dy banues në fshatin Tapi, Kuçovë, për veprat penale “Fshehja e të ardhurave” dhe “Mashtrimi me produktet ushqimore”, kryer në bashkëpunim.
“Seksioni për Hetimin e Krimit Ekonomik e Financiar, pas denoncimit të marrë nga gazetarët e emisionit investigativ ‘Stop’, organizuan punën dhe nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Berat, finalizuan operacionin policor të koduar ‘Oil’
Gjatë operacionit u arrestua në flagrancë shtetasi A. A., 56 vjeç, si dhe u shpall në kërkim djali i tij shtetasi D. A, 29 vjeç, të dy banues në fshatin Tapi, Kuçovë, për veprat penale ‘Fshehja e të ardhurave’ dhe ‘Mashtrimi me produktet ushqimore’, kryer në bashkëpunim”, thuhet në njoftim.
Nga veprimet hetimore të kryera, ka rezultuar se shtetasit A. A. dhe D. A në bashkëpunim me njëri-tjetrin, kanë përshtatur në banesën e tyre një ambient ku përgatisnin përzierje të vajrave të ndryshëm dhe produkteve të panjohura, më pas i reklamonin në faqen e tyre në Facebook “Vaj Ulliri Bio Jugu” dhe i shisnin si vaj ulliri bio.
“Nga veprimet hetimore është dokumentuar ligjërisht fakti se autorët e dyshuar i përgatisnin këto produkte në banesën e tyre dhe me pas i tregtonin te shtetas të ndryshëm në të gjithë vendin nëpërmjet një poste private.
Në cilësinë e provës materiale janë sekuestruar rreth 3000 litra lëndë vajore e papërcaktuar, 1000 litra, e dyshuar vaj kikiriku, një lap-top dhe printeri me të cilin printoheshin etiketat postare, 2 900 000 lekë dhe 1800 euro, të cilat dyshohet se janë përfituar nga kjo veprimtari e kundërligjshme”, thuhet në njoftim.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat. /Telegrafi/
