MPB këtë mëngjes e ka arrestuar Dragi Rashkovskin dhe e kanë dërguar në gjykatë, pasi Prokuroria për Ndjekjen e Krimit të Organizuar dhe Korrupsionit kërkon paraburgim për të.
Së bashku me Rashkovskin është arrestuar edhe Daniell Stançeski, pronar i kompanisë “Ivonka Group”. Paraburgimi kërkohet për shkak të lëndës që e ka hapur Prokuroria, në lidhje me blerjen e një softveri që nuk është shfrytëzuar kurrë.
Prokuroria nëpërmjet një kumtese e ka konfirmuar kërkesën për paraburgim dhe hapjen e lëndës ndaj Rashkovskit dhe tre personave tjerë.
Rashkovski para disa ditësh dha dorëheqje nga funksioni i sekretarit për monitorim dhe ndihmë të institucioneve për realizimin e programit të Qeverisë dhe projekteve strategjike.
Kryeministri Zoran Zaev e pranoi dorëheqjen e tij./Telegrafi/