Drejtori i Drejtorisë për Mbrojtjen e Trashëgimisë Arkeologjike, Arian Asllanaj sot tregoi se çfarë shkruan në pllakën arkeologjike që u gjet në Karposh të Shkupit.
Në pllakë janë shkruar emrat e Epi Kratit dhe bashkëshortes së tij me tre djemtë, nëri prej të cilëve emrin e ka pasur Dardanus.
“Në mbishkrimin e epitafit që u bë aq shumë e famshme shkruan: I ndjeri është Epi Krati, i cili e ka shënuar shoqen e tij dhe tre djemtë e tij, i cili djali i tretë e ka emrin Dardanus”, tha Asllanaj.
Ndërsa zv.kryeministri, Artan Grubi siguroi se deri sa nuk nxirren të gjitha artefaktet, në zonën arkeologjike ku u gjet pllaka “Dardanus” në Karposh të Shkupit nuk do të lejohet ndërtimi.
Grupi tha se janë respektuar procedurat ligjore nga investitori dhe nuk bëhet fjalë për përvetësim të artefakteve.
“Të gjitha artefaktet që gjenden këtu, do të dërgohen në Muzeun e Shkupit nga Qendra Konservatore e cila po bën në fakt punimet këtu, e jo investitori. Derisa nuk kryejnë punë nga Qendra Konservatore e qytetit të Shkupit, nuk fillon ndërtimi i çfarëdo qoftë objekti në këtë vendbanim”, tha Grubi.