Sipas një raporti të ri thuhet se Apple tashmë i ka bërë porositë tek furnitorët e saj, Foxconn dhe Pegatron, të cilëve u ka kërkuar që të krijojnë 68 milionë njësi të iPhone 6, dhe mësohet se kjo është vetëm porosia e parë e telefonit që pritet ta pushtojë botën.
Apple do ti lansojë dy versione të ndryshme të iPhone 6, njërin me ekranin prej 5.5” dhe tjetrin, i cili pritet të quhet iPhone Air, me ekranin prej 4.7”.
Në mësin e shumë thashethemeve të cilat kanë qarkulluar në publik për një kohë të gjatë, janë edhe këto të fundit të cilat pretendojnë se ekrani i të dyja modeleve do të jetë nga safiri, dhe se Apple tashmë i ka regjistruar këto formate të ekranit si patenta të saj.
Nëse del të jetë kështu, atëherë gjenerata e re e iPhone do të jetë shumë më e qëndrueshme, pasi që ekrani do të jetë shumë më rezistues ndaj gërvishtjeve apo thyerjeve.
Gjithashtu, pritet që iPhone 6 ta sjell versionin e ri të TouchID, skanerit të gishtave që thuhet se do të jetë më i saktë, dhe më i qëndrueshëm sesa versioni paraprak. Prezantimi i iPhone 6 pritet të ndodhë më 9 shtator, ndërsa shitja do të fillojë më 19 shtator, fillimisht në SHBA dhe Mbretërinë e Bashkuar. /Telegrafi/