Korporata e Postë -Telekomit në tenderin “Platforma e Faturimit” ia ka dhënë “ekstra” 9 milionë euro një kompanie nga Qiproja.
Ky veprim i kësaj ndërmarrjeje publike ka tërhequr vëmendjen e Agjencisë Kosovare Kundër Korrupsionit, i cili zotohet se do ta procedojë rastin në prokurori.
Përmes këtij tenderi të mbyllur në prill të këtij viti, PTK-ja ka ndarë afro 20 milionë për kompaninë nga Qiproja “Amdocs Development Limited”, për të krijuar dy platforma të ndara të faturimit për njësinë e Telekomit dhe të telefonisë mobile VALA. Për të dy njësitë e PTK-së kjo kompani në vitin 2010 ka kërkuar rreth 10 milionë euro për secilën veç e veç.
Dy vjet më parë kompania “Amdocs”, sipas dokumenteve që ka siguruar gazeta Koha Ditore, kërkonte 11 milionë euro për një platformë të përbashkët të faturimit për të dy njësitë e PTK-së.
Sipas Agjencisë Antikorrupsion, buxheti i kësaj korporate në këtë rast është dëmtuar për miliona euro.(koha)