Deputetja nga radhët e Vetëvendosjes, Albulena Haxhiu ka bërë të ditur se KGJK ka konfirmuar shqetësimin e saj të ngritur për shkeljen kushtetuese nga ana e anëtarit të KGJK-së, që njëherish është edhe kandidat për deputet për zgjedhjet e Serbisë, në listën e Vuçiqit.
“Të shtunën kam ngritur shqetësimin tim në lidhje me shkeljen kushtetuese nga ana e anëtarit të KGJK-së që njëherit është edhe kandidat për deputet për zgjedhjet e Serbisë, në listën e Vuçiqit.
Sot, nga Këshilli Gjyqësor jam njoftuar se bëhet fjalë për të njëjtin person sepse e ka pranuar edhe personi në fjalë, poashtu Këshilli Gjyqësor i Kosovës me anë të shkresës më ka njoftuar se do të nis procedurat për shkarkimin e tij!”, ka shkruar në Facebook, Haxhiu.
Ajo ka theksuar se kjo që ka ndodhur është e paprecedent.
“Këtu nuk bëhet fjalë vetëm për rrespektim të Kushtetutës dhe ligjit por edhe për ndërprerje të ndikimit të Serbisë në institucionet që konsiderohen të pavarura. Abuzimi që Serbia po i bën Republikës në forma të ndryshme duhet të ndërpritet. Kjo që ka ndodhur është e paprecedent!”, shkruan Haxhiu./Telegrafi/
