Trajneri i Real Madridit, Carlo Ancelotti ka folur pas humbjes së mbrëmshme (e martë) nga Paris Saint-Germain, duke theksuar se ekipi duhet të përmirësohet në ndeshjen e kthimit, teksa pati fjalë të mëdha për sulmuesin Kylian Mbappe.
Real Madridi u mposht me rezultat minimal 1-0 në ndeshjen e parë të 1/8-tës në Ligën e Kampionëve, me golin e vetëm të shënuar nga Mbappe në minutat shtesë të ndeshjes.
Kjo humbje ka lënë shije të hidhur te Los Blancos, por trajneri Ancelotti është optimist për ndeshjen kthyese, edhe pse sipas tij ekipi duhet të përmirësohet.
“Nuk ishte një paraqitje e mirë, ata e meritonin të fitonin dhe ne nuk krijuam shumë, por ndeshja e dytë do të jetë një ndeshje ndryshe”, ka thënë fillimisht Ancelotti pas ndeshjes.
“Jam optimist, edhe pse duhet të përmirësohemi në ndeshjen e kthimit. Na ka mbetur një ndeshje në shtëpi dhe nuk duhet të shqetësohemi për një gol jashtë fushe”.
“Është e qartë se PSG ka një avantazh të mirë, por shpresoj se nuk mjafton për ta”.
“I thashë gjyqtarit se ai na ndëshkoi me dy kartonë të verdhë që nuk ishin të qartë”.
“Mbappe është praktikisht i pandalshëm, ne u përpoqëm ta kontrollonim. Militao bëri shumë mirë, por ai gjithmonë mund të dalë me diçka të re dhe ai e bëri atë në minutën e fundit të lojës”, përfundoi italiani. /Telegrafi/