Presidentja e Komisionit Evropian, Ursula von der Leyen, ka planifikuar një drekë pune me udhëheqësit e vendeve të Ballkanit Perëndimor më 19 shtator në Bruksel.
Ky takim vjen si një shenjë e përkushtimit të saj për të mbështetur rajonin dhe procesin e zgjerimit të Bashkimit Evropian (BE) gjatë mandatit të saj të dytë në krye të Komisionit.
Diskutimet kryesore do të përqendrohen në “agjendat e reformave dhe rritjes” të vendeve të Ballkanit Perëndimor, të cilat janë dorëzuar në Komisionin Evropian si pjesë e parakushteve për përfitimet nga Plani i Rritjes për Ballkanin Perëndimor.
Ky plan, i miratuar nga BE-ja në maj, përfshin një paketë financiare prej 6 miliardë eurosh për periudhën 2024-2027, e cila synon të përshpejtojë rritjen ekonomike dhe integrimin evropian të rajonit.
Përmes këtij plani, Kosova pritet të përfitojë mbi 880 milionë euro, ku më shumë se 250 milionë janë grante, ndërsa pjesa tjetër do të jetë në formën e kredive të favorshme.
Agjendat e reformave janë të bazuara në rekomandimet e trupave të BE-së dhe janë dorëzuar tashmë nga shumica e vendeve të rajonit, përveç Bosnje e Hercegovinës, e cila ende nuk e ka paraqitur planin për shkak të sfidave të brendshme politike.
Von der Leyen, e cila ka promovuar personalisht Planin e Rritjes, e ka konsideruar këtë takim si mundësi për të vlerësuar përparimin e vendeve drejt përmbushjes së kritereve për financime.
Ndërsa Komisioni Evropian kishte planifikuar të miratonte agjendat e reformave para 19 shtatorit, ky proces është shtyrë për tetor, pjesërisht për shkak të vonesave të Bosnje e Hercegovinës.
Ndërkohë, BE-ja ka theksuar se përfitimet financiare nga ky plan varen nga përmbushja e kushteve që lidhen me sundimin e ligjit dhe kontrollin financiar sipas standardeve evropiane.
Për Kosovën dhe Serbinë, është theksuar edhe përparimi në procesin e normalizimit të marrëdhënieve si kusht specifik.
Plani i Rritjes nuk synon të krijojë një alternativë për zgjerimin e BE-së, por të lehtësojë procesin e anëtarësimit për vendet e Ballkanit Perëndimor, ndërsa përfshin nxitjen e bashkëpunimit rajonal dhe zhvillimin e një tregu të përbashkët që do të integrohet gradualisht në tregun e BE-së./Telegrafi/