Sipas mendimit të analistëve politik dhe sektorit joqeveritar, shqiponja në Çair dhe kryqi në Butel janë skenare të vjetra dhe pa vlerë të keqpërdorimit të ndjenjave kombëtare dhe fetare në funksion të pikëve politike parazgjedhore dhe mjegullimit të mundësive që funksionerë të lartë shtetëror të japin përgjegjësi para Prokurorisë Speciale Publike (PSP), transmeton Telegrafi.
Xhabir Deralla nga OJQ ”Civil” thotë se me këto skenare krijohet një perde tymi për të zhvendosur hetimet për krimet e tyre, kurse Bojan Mariçiq deklaron se kjo është një mundësi e fundit për ta varrosur Marrëveshjen e Përzhinos dhe për t’i ikur përgjegjësisë penale.
Ndërkaq, analisti Ramadan Ramadani thekson se dallimi me kalanë është se në atë kohë kishte popull nga të dyja palët, kurse në këtë rast janë të pranishëm funksionerë shtetëror dhe partiak të përkatësisë shqiptare dhe maqedonase.
Në debat ishte i pranishëm edhe zv. ministri shtesë i financave, Kire Naumov, i cili shtoi se financat tregojnë që çdo herë, në periudhë zgjedhjesh, pushteti i keqpërdor paratë e shtetit./Telegrafi/