Taksa ndaj Serbisë ka sjellë edhe çarje të dukshme në koalicionin qeverisës. E, njohësit e zhvillimeve politike në vend thonë se një formatizim i Qeverisë në këtë fazë është më i mundshëm sesa shkuarja në zgjedhje.
Lidhja Demokratike e Kosovës së fundmi po deklaron se ka një kusht për tu bërë pjesë e dialogut me Serbinë. E ajo është marrëveshja për zgjedhje të reja dhe qeveri gjithëpërfshirëse ose formimi i një qeverie teknike, në të cilën do të përfshiheshin të gjitha partitë.
Politologu Donik Sallova thotë se koalicioni qeverisës është në krizë dhe beson se LDK-ja mund të jetë pjesë e qeverisë së re.
“Kjo është Qeveri pa legjitimitet. Edhe përplasja e fundit mes partnerëve për taksën, tregon se Qeveria është në krizë dhe rënia e saj është çështje kohe deri në momentin kur të krijohet një qeveri tjetër me bazë të gjerë. Besoj që LDK-ja do të përfshihet në një qeveri të ardhshme teknike ose me bazë të gjerë”, shprehet Sallova, përcjell Telegrafi.
Ai thotë se qeveria gjithëpërfshirëse është më e mundshme në këtë fazë sesa shkuarja në zgjedhje.
“Qeveria me bazë të gjerë është shumë më e mundshme se zgjedhjet e reja, sepse shkuarja në zgjedhje nuk na garanton formim të shpejt të qeverisë. Ne i dimë ato ngërçet që po krijohen pas çdo palë zgjedhjeve në Kosovë”, shton Sallova.
Analisiti politik, Fisnik Halimi thotë se zgjedhjet në këtë fazë nuk janë opsion i mundshëm.
“Mendoj që zgjedhjet nuk janë opsion i afërt për Kosovën sepse kjo nuk është në interes të partnerëve tanë kryesor ndërkombëtar, pasi që në interes të tyre është që kjo përbërje e Kuvendit të Kosovës ta qoj deri në fund negociatën Kosovë-Serbi”, deklaroi Halimi.
Përmes një postimi në rrjetin social Facebook, Kryetari i PSD-së, Shpend Ahmeti ka mohuar se partia e tij mund të jetë pjesë e një qeverie të re së bashku me LDK-në. Ndërsa ka shtuar se subjekti i tij politik do të vazhdoi të japë mbështetje politike për taksën./RTV Dukagjini/Telegrafi/