Deputetët e Kuvendit të Kosovës në seancën e së premtes, kanë miratuar pesë marrëveshje ndërkombëtare.
Shefi i Zyrës së Bashkimit Evropian në Kosovë, Tomas Szunyog, ka përshëndetur miratimin e këtyre marrëveshjeve, duke thënë se në këtë mënyrë Kosova ka intensifikuar bashkëpunimin me BE-në.
“Jam i lumtur dhe mirënjohës për këtë zhvillim”, ka shkruar Szunyog në Twitter.
Me 81 vota për, dje është ratifikuar vendimi i Këshillit të Stabilizim Asociimit, BE-Kosovë, për amendamentimin e marrëveshjes së Stabilizim Asociimit mes BE-së dhe komunitetit evropian të energjisë atomike dhe Kosovës.
Po ashtu, është miratuar edhe marrëveshja dypalëshe e bashkëpunimit ndërmjet Republikës së Kosovës dhe Dukatit të Madh të Luksemburgut, ku mori mbështetjen e 86 deputetëve.
Deputetë të pozitës e opozitës kanë ratifikuar me 83 vota edhe amendamentin e dytë të marrëveshjes financiare mes Republikës së Kosovës dhe Bashkimit Evropian për programin “IPA 2015”.
Me 85 vota për është miratuar edhe marrëveshja financiare mes Republikës së Kosovës dhe BE-së për programin “IPA 2018”.
Në seancën e djeshme është miratuar edhe marrëveshje financiare mes Kosovës dhe BE-së për programin “IPA 2021”, me 86 vota për. /Telegrafi/
With ratifying Kosovo’s participation in the🇪🇺’s Fiscalis & Customs programmes, as well as the outstanding Instrument of Pre-Accession Assistance funding arrangements, the Assembly of #Kosovo yesterday furthered🇽🇰’s cooperation with the #EU. Happy & grateful for this development.
— Ambassador Tomáš Szunyog (@EUAmbKS) October 15, 2022