Ambasadori i Britanisë në Kosovë, Nicholas Abbott, ka përgëzuar ekipet nga Kosova për heroizmin dhe përkushtimin e tyre për të shpëtuar jetën e qytetarëve të Shqipërisë, duke rrezikuar kështu edhe jetën e tyre.
Abbott ka thënë se këtë javë të gjithë kemi parë skenat tragjike, pas një numri të tërmeteve shkatërruese që ndodhën në Shqipëri, transmeton Telegrafi.
“Bashkëndjejmë me viktimat dhe familjet e tyre. Ne po ashtu kemi parë një përgjigje të shkëlqyeshme dhe të shpejtë të Forcës së Sigurisë së Kosovës dhe Policisë së Kosovës. Unë dua të përgëzoj ekipet nga Kosova për heroizmin dhe përkushtimin e tyre për të shpëtuar jetë derisa rrezikonin jetën e tyre”, ka shkruar ai në profilin e tij zyrtar në Facebook.
Ndryshe, deri tani numri i viktimave nga tërmetet në Shqipëri ka arritur në 49, ndërsa mbi 900 persona tjerë janë të lënduar./Telegrafi/
