Ambasadori i Shteteve të Bashkuara të Amerikës në Beograd, Kyle Scott, ka rikujtuar faktin se edhe pas gati dy dekadash që nga zbulimi i trupave, askush nuk është dënuar për vrasjen e tyre.
Bëhet fjalë për tre qytetarët amerikanë, tre vëllezërit Bytyçi, të cilët, siç ka kujtuar ambasadori Scott, u gjendën në një varr masiv me trupat e 75 kosovarëve.
“Në këtë ditë në vitin 2001, në Petrovo Selo u zbulua një varr masiv me trupat e 75 kosovarëve. Ndër të vdekurit ishin tre qytetarë amerikanë, vëllezërit Bytyçi. Deri më sot, askush nuk është dënuar për këtë vrasje jashtëgjyqësore. #DrejtësipërTëgjithëViktimat”, ka shkruar Scott në Twitter, përcjell Telegrafi.
Kanë kaluar gati dy dekada nga vrasja e vëllezërve Ylli, Agron dhe Mehmet Bytyqi në Serbi dhe ndaj askujt nuk janë ngritur akuza penale, me gjithë premtimet e qeverisë serbe për të sjellë ekzekutorët e krimit përpara drejtësisë.
On this day in 2001, a mass grave with the bodies of 75 Kosovars was uncovered in Petrovo Selo. Among the dead were three American citizens, the Bytyci brothers. To this day, no one has been punished for this extrajudicial murder. #JusticeforAllVictims
— Ambassador Kyle Scott (@usambserbia) June 14, 2019
Shtetet e Bashkuara prej kohësh i kanë kërkuar qeverisë serbe të nxjerrë përpara drejtësisë ata që ekzekutuan tre vëllezërit Bytyqi, të cilët u arrestuan në korrik 1999, pas mbarimit të luftës së në Kosovë, kur ishin duke kaluar gabimisht kufirin në Serbi. Ajo që dihet është se megjithë vendimin e një gjykatësi për lirimin e tyre, ata u morën nga një njësi serbe e operacioneve speciale, u ekzekutuan dhe u lanë sipër një varri masiv.
Ndryshe, në një intervistë për Telegrafin, Ilir Bytyqi, vëllai i tre dëshmorëve Ylli, Agron dhe Mehmet Bytyqi, luftëtarë të Ushtrisë Çlirimtare të Kosovës – që u vranë pas përfundimit të luftës nga forcat serbe ka thënë se vendosja e drejtësisë do të lehtësonte atë, por plaga nuk do të shërohej asnjëherë.
Ai ka thënë se në bazë të njohurive të tij, hetimit për vrasjen e vëllezërve Bytyqi i ka ardhur fundi dhe se për vrasësit edhe Vuçiqi ka informacion.
Ilir Bytyçi ka shtuar se së bashku më vëllain Fatosin dhe disa kongresistë amerikanë kanë takuar presidentin serb, i cili edhe ka përmendur emrin prej njërit prej vrasësve të vëllezërve të tyre. /Telegrafi/