Dani Alves ka refuzuar ta vazhdojë kontratën me Paris Saint-Germainin, duke shpresuar për një kalim në Ligën Premier gjatë kësaj vere .
Mbrojtësi brazilian e dëshiron largimin nga skuadra franceze, pasi këta të fundit i kanë ofruar vetëm një vit kontratë, ndërsa ajo aktuale skadon në fillim të muajit të ardhshëm.
36-vjeçari ishte lidhur me një kalim në Angli në vitin 2017 (te Manchester Unitedi, Chelsea dhe Manchester City), por në fund vendosi të transferohej te PSG nga Juventusi si lojtar i lirë.
Tani, Alves është duke e kërkuar transferimin në Ligën Premier, pasi dëshira e tij është që të transferohet te Citizens, aty ku do të bashkëpunonte sërish me Pep Guardiolan.
Mbrojtësi brazilian është i acaruar me PSG-në, pasi u ka kërkuar dy vite kontratë në mënyrë që të qëndronte në Parkun e Princave, mirëpo kërkesa e tij u refuzua.
“Ideja që unë ta përfundoj karrierën pa shkuar në Ligën Premier, nuk është e mundur. Aty është futbolli më i bukur në botë. Së pari, respektin që kanë tifozët dhe pasionin që ke në fushë kur luan atje”, ka thënë Alves. /Telegrafi/