Përzgjedhësi i Kosovës, Alain Giresse, ka thënë se është ndarë i kënaqur me barazimin në ndeshjen miqësore kundër Armenisë e zhvilluar në “Fadil Vokrri” dhe u mbyll me rezultatin 2-2.
Giresse për këto ndeshje kishte tubuar lojtarë të rinj të cilët janë potencial për një fanellë të ekipit A të Kosovës.
Trajneri francez e pranoi se Kosova nuk luajti mirë në pjesën e parë, por në pjesën e dytë tha se lojtarët reaguan dhe i përgëzoi për këtë.
“Çka është me rëndësi është se nuk e humbëm ndeshjen, pasi barazuam. Sa i përket gjërave negative dhe pozitive të këtij dueli, nuk mund t’i themi tani për shkak se duhet ta analizojmë ndeshjen”.
“Gjëja pozitive ishte reagimi i lojtarëve tanë pas disavantazhit. Edhe në pjesën e dytë, luajtëm shumë më mirë se në të parën”.
“Pas pjesës së parë, edhe bëmë ndryshime në pozicionime në fushë dhe motivuam lojtarët, të cilët reaguan për ta mbyllur ndeshjen me barazim”.
“Herët është një mendim për lojtarët se si luajtën apo cilat emra mund të jenë në të ardhmen pjesë e Kosovës. Herët është edhe ndeshja me Ishujt Faroe, kështu që duhet të presim dhe të shohim”, ka thënë Giresse. /Telegrafi/