Për marrëdhëniet Leo Messi-PSG vazhdon të flitet edhe muaj pas largimit të argjentinasit nga ky klub pas dy vitesh qëndrim.
Argjentinasi kishte thënë ditë më parë se ishte “i vetmi lojtar që nuk mori pritje nga klubi, nga 25 lojtarët që fituan Kupën e Botës”.
Pak ditë më vonë, Al Khelaifi ka dashur t’i kundërpërgjigjet argjentinasit në një deklaratë për mediat franceze.
“Jashtë flitet shumë, nuk e di se çfarë ka bërë apo çfarë nuk ka thënë. Siç e panë të gjithë, ne publikuam edhe një video, e uruam Messin në stërvitje, edhe privatisht. Por duhet respekt, ne jemi një klub francez ”, deklaroi presidenti.
Kreu i lartë shpjegoi se nuk mund të bënin një festë të madhe në stadium.
“Nuk mund të bënim festë pasi ai mundi Francën, nuk do të ishte mirë për shokët e tij francezë në ekip dhe për tifozët tanë. Ishte delikate të bësh festën në stadium”, deklaroi Al Khelaifi. /Telegrafi/