Jack Lilley, aktori dhe stuntmani i njohur për rolet e tij në serialin klasik “Little House on the Prairie”, ka ndërruar jetë në moshën 91-vjeçare.
Lajmin e hidhur e kanë konfirmuar djali i tij, Clint Lilley, dhe aktorja Melissa Gilbert përmes postimeve prekëse në Instagram.
Lilley pati një karrierë të pasur në Hollywood si aktor dhe stuntman, duke luajtur role të ndryshme në industrinë e filmit për dekada me radhë, shkruan usatoday.
Ai u shfaq në mbi 280 filma, përfshirë “Sudden Impact” (1983), “Young Guns” (1988), “Planet of the Apes” (2001) dhe “The Legend of Zorro” (2005).
I lindur në Teksas, ai u zhvendos në Los Angeles si fëmijë, kur babai i tij filloi të merrte me qira kuaj për filmat e Hollywood-it.
Ai ndoqi të njëjtën rrugë si babai i tij, duke u bërë një emër i njohur në botën e stuntman-ëve dhe filmave me tematikë perëndimore.
Në jetën private, ai dhe gruaja e tij Irene u vendosën në Santa Clarita Valley, Kaliforni, ku ndërtuan një jetë familjare të lumtur dhe rritën dy djemtë e tyre, Clint dhe Cash.
Melissa Gilbert, e cila luajti Laura Ingalls Wilder në “Little House on the Prairie”, e përkujtoi Lilley-n me fjalë të ngrohta, duke thënë se ai ishte një nga njerëzit e saj të preferuar dhe se i mësoi asaj si të hipte kalin kur ishte ende e vogël.
“Ai jetoi një jetë të bukur dhe ndihem me fat që e pata si mik”, shtoi ajo.
Familja Lilley ka premtuar të organizojë një ceremoni për të nderuar jetën dhe trashëgiminë e tij. /Telegrafi/