Ministria e Ambientit Jetësor dhe Planifikimit Hapësinor, në kuadër të fushatës tradicionale “Maqedonia pa mbeturina”, në bashkëpunim me pushtetet lokale dhe Bashkinë e Shkupit do të fillojnë aksionin për pastrimin e deponive të egra në disa komuna të shtetit, përcjell Telegrafi Maqedoni.
Në fazën e parë, aktivitetet do të përfshihen në komunat e Bosilovës, Dibrës, Krushevës, Mavrovës, Resnjës, Sarajit dhe komunën e Tetovës, në rrugën për në Kodrën e Diellit.
Ministria e Ambientit Jetësor dhe Planifikimit Hapësinor pret nga këto hapa konkret në terren të përmirësohet dukshëm gjendja e deponive të egra në vend, të zvogëlohet ndikimi i dëmshëm i tyre dhe të lokalizohen, me qëllim që të kontrollohen më lehtë.
Në fazën e parë, përkrah komunave dhe ndërmarrjeve komunale do të jenë edhe Drejtoria për Mbrojtje dhe Shpëtim, “Rrugët e Maqedonisë” dhe “Pyjet e Maqedonisë”./Telegrafi/