Ministri kroat i Mbrojtjes, Mario Banozhiq është përfshirë në një aksident trafiku mëngjesin e sotëm në të cilin ka humbur jetën një person.
Ministri po drejtonte automjetin personal me të cilin u përplas me një furgon, shoferi i të cilit ka mbetur i vdekur, raporton index.hr.
Aksidenti ka ndodhur në orën 06:15 të ditës së sotme, në dalje të Vinkovcit në drejtim të Zhupanjës.
Nga Spitali i Përgjithshëm i Qarkut Vinkovci konfirmuan se ministri është lënduar rëndë, ndërsa zëdhënësi i qeverisë tha se nuk është në rrezik për jetën.
“Ministri ka lëndime në kokë, por tani për tani nuk e ka humbur vetëdijen”, pohoi drejtori i spitalit, Krunoslav Spoçiq.
Ndërkohë, një hetim e ka nisur zëvendësi i Prokurorisë së Shtetit të Qarkut në Vukovar, pas të cilit do të dihen më shumë detaje.
Ndryshe, Banozhiq ishte i veshur si gjuetar në momentin e aksidentit pasi paraprakisht kishte dalë për gjueti. /Telegrafi/
