Me gjithsej 39 vite burg janë dënuar të akuzuarit në rastin “Llaskarca”, që ka të bëjë me aksidentin e autobusit që ndodhi në vitin 2019 ku humbën jetën 16 udhëtarë dhe mbi 30 u plagosën.
Pronari i kompanisë “Durmo Tours” Durmish Behluli u shpall fajtor dhe u dënua me katër vite burg, ndërsa shoferi i autobusit të aksidentuar Manuel Tripunovski u dënua me 14 vite burg.
Të akuzuarit tjerë në këtë rast u dënuan si më poshtë:
Remzi Miftari – 6 vite burg
Igor Gjorgjievski – 5 vite burg
Goran Terpkovski – 5 vite burg
Jane Bovarovski – 5 vite burg
Në procedurën e dëshmive u nxorën disa dëshmi verbale dhe materiale, ndërkaq u krye ekspertiza dhe superekspertiza.
Mbrojtja e të akuzuarve në fjalët përmbyllëse potencoi se në procedurën dëshmuese nuk është dëshmuar barra që u ngarkohet secilit nga të akuzuarit posaçërisht dhe kërkuan aktvendim lirues.
Prokurori publik, Darko Jakimovski, nga ana tjetër, në fjalët e tij përmbyllëse kërkoi dënim më të ashpër, sepse, sipas tij, tek të gjithë të akuzuarit ka ekzistuar pakujdesia në veprim dhe ka qenë çështje kohe vetëm në cilën bazë, siç tha “kaosi i punës mund të rezultojë me pasoja të këtilla apo të ngjashme”.
Ndryshe, në aksidentin e 13 shkurtit të vitit 2019 në rrugën Shkup – Tetovë, humbën jetën 16 pasagjerë dhe 38 të tjerë u lënduan. Procesi gjyqësor ka filluar më 5 shtator të vitit 2021./Telegrafi/