Dy sprinterët britanikë, James Ellington dhe Nigel Levine, pritet të mungojnë së paku në angazhimet e këtij viti, pas lëndimeve serioze me një motoçikletë në Spanjë.
Ellington e ka thyer këmbën në dy vende, ndërsa të dy sportistët kanë pësuar fraktura në pelvik.
Federata britanike e atletëve ka bërë të ditur se dy atletët janë të vetëdijshëm dhe gjendja e tyre është stabile. Sidoqoftë, testet e mëtutjeshme mjekësore do të tregojnë për seriozitetit e lëndimit.
Ellington dhe Levine ishin duke vozitur motoçikletën kur janë përplasur me një veturë që voziste në drejtim të kundërt.
Aksidenti ka ndodhur të martën mbrëma, ndërsa frakturat në pelvik zakonisht ua rrezikojnë karrierën atletëve.
31-vjeçari Ellington është specialist në distancat 100m dhe 200m dhe pjesëmarrës i dyfishtë në Lojërat Olimpike, ndërsa ka qenë pjesë e triumfit në medaljen e artë të Kampionateve Evropiane 2014 dhe 2016 në 4x100m
Nga ana tjetër, 27-vjeçari Levine është një vrapues në 400m, i cili ka lindur në Trinidad, ndërsa është rritur në Northamptonshire. Ai e ka fituar medaljen e artë evropiane në vitin 2014. /Telegrafi/