Aleanca Kosova e Re në Kamenicë dhe dega e Lidhjes Demokratike të Kosovës në këtë Komunë, kanë arritur marrëveshje bashkëpunimi për mbështetjen e kandidatit të kësaj të fundit, Shaip Surdulli në garën për kryetar të Komunës, në balotazhin e 19 nëntorit, ku do të garojë me kandidatin e VV-së, Qëndron Kastrati.
Lajmin e ka bërë të ditur përmes një postimi në Facebook, kryetari i Degës së AKR-së në Kamenicë, Fatmir Matoshi.
“Dega e AKR-së sonte unanimisht vendosi që të arrijë marrëveshje për bashkëpunim me LDK-në për zgjedhjet e balotazhit dhe qeverisjen e ardhshme katërvjeçare në Kamenicë.
Ftoj qytetarët e Kamenicës që ta mbështesim kandidatin tonë të përbashkët për Kryetar Komune z. Shaip Surdulli.
Na priftë e mbara”, thuhet në postimin e Matoshit, i cili ka postuar edhe faksimilet e tekstit të marrëveshjes me LDK-në, të nënshkruar nga ai dhe Shaip Surdulli i LDK-së. /Telegrafi/
