Kryetari i Komunës së Prishtinës, Shpend Ahmeti ka reaguar pas masave të reja kufizuese që ka ndërmarrë Qeveria e Kosovës.
Ahmeti ka thënë se mbyllja e bizneseve përderisa kufijtë janë të hapur është motiv për qytetarët të shkojnë në Tiranë e Shkup, transmeton Telegrafi.
Gjithashtu, ai ka pohuar se nuk ka pasur konsultim mes Qeverisë dhe kryetarëve të komunave për masat e reja.
“Mbyllja e krejt bizneseve përderisa kufijtë janë të hapur veçse është motiv për qytetarët tonë me ja mësy Tiranës e Shkupi që nuk e kanë gjendjen fare më të mirë se ne.Informimi i kryetarëve të komunave dhjetë minuta para publikimit në media nuk është konsultim”, ka shkruar Ahmeti në Facebook.
Ndryshe, Qeveria e Kosovës ka marrë vendim që në fundjavë të u ndalohet veprimtaria e të gjitha subjekteve afariste dhe bizneseve, qendrave tregtare e rekreative, supermarketeve, subjekteve që ofrojnë shërbimet e gastronomisë (restorantet, kafiteritë dhe të ngjashme) në tërë territorin e Republikës së Kosovës, prej orës 20:00, më 06/11/2020 (e Premte) deri më 09/11/2020 (e Hëne) në orën 05:00.
Po ashtu, Qeveria ka vendosur që të fut në karantinë shtatë komuna për: Prishtinën, Fushë Kosovën, Gjilanin, Obiliqin, Gjakovën, Podujevën dhe Shtimen.
Në komunat e lartë cekura ndalohet hyrja/dalja e qytetarëve dhe automjeteve private prej orës 20:00 të dt.06/11/2020 deri në orën 05:00 të dt. 09/11/2020. /Telegrafi/
