Kryetari i BDI-së, Ali Ahmeti dhe ai i OBRM-PDUKM-së, Hristijan Mickoski, sot kanë realizuar takimin e parë zyrtar, ku kanë biseduar për çështjet aktuale në vend.
Kryetari i BDI-së pas takimit tha se ky nuk ka qenë takim për marrëveshje, por për të uruar kryetarin e ri të OBRM-PDUKM-së. Ai shtoi se ka marrë garancë nga Mickoski se do të mbështetë reformat në vend, njofton Telegrafi Maqedoni.
Nga ana tjetër Hristijan Mickoski tha se përderisa nuk ka përgjegjësi për deputetët e arrestuar të tyre, ata nuk do të marrin pjesë në punën e Kuvendit.
“Kishin takim konstruktiv. Ahmeti erdhi të më urojë zgjedhjen si kryetar i OBRM-PDUKM-së. Do të kontribuojmë në mënyrë njerëzore, por edhe me kapacitet tjetër”, tha Mickoski.
Përndryshe, OBRM-PDUKM-ja në shenjë proteste ndaj arrestimit të disa deputetëve të tyre, ka vendosur që të bojkotojë punën e Kuvendit dhe të mos merr pjesë në diskutimet që zhvillohen në shtëpinë ligjvënëse./Telegrafi/
