Kryetari i Bashkimit Demokratik për Integrim (BDI), Ali Ahmeti, ka pritur në takim ambasadorin e Italisë në Maqedoni, Carlo Romeo. Në takim është diskutuar për formimin e qeverisë dhe në përgjithësi për situatën politike pas ngjarjeve të 27 prillit në Kuvend si dhe për zgjedhjet lokale, njofton Telegrafi Maqedoni.
Nga BDI përmes kumtesës njoftojnë se Ahmeti në takim ka theksuar se partia e tij respekton dhe përkrah rendin kushtetues dhe karakterin unitar të vendit.
“Ahmeti nënvizoi që nuk ka asnjë arsye për vonesa dhe që për prioritet e qeverisë së re janë reformat në gjyqësor, integrimi euroatlantik, Marrëveshja e Ohrit, marrëdhënie të mira ndëretnike dhe ndërfqinjësore, por edhe zhvillimi ekonomik dhe hapja e vendeve të reja të punës. Në lidhje me zgjedhjet lokale, Ahmeti tha që BDI përkrah ndryshimet e menjëhershme në kodin zgjedhor për t’ju mundësuar funksionim normal komunave gjer në mbajtjen e zgjedhjeve dhe zgjedhjes së administratës së re”, thuhet në kumtesën e BDI-së./Telegrafi/