Kryetari i Prishtinës, Shpend Ahmeti ka njoftuar se çerdhet në kryeqytet, të cilat u mbyllën pas dyshimeve se fëmijët mund të jenë infektuar më COVID-19, tashmë do të hapen.
Ahmeti tha se të gjithë fëmijët e testuar kanë rezultuar negativ, kurse sipas tij pas 10 rasteve të paraqitura në kryeqytet të dielën, ka pritur numër më të madh të rasteve pozitive.
“29 raste të reja e 13 raste në Prishtinë. E pritshme. Pas 10 rasteve të reja të dielën këto tre ditë janë testuar mbi 200 kontakte të këtyre personave. Testimet janë bo tre ditë rresht dhe realisht kemi pritur numër edhe më të madh. Tani vetëizolim dhe ndalesë e përhapjes. Lajm i mirë, që fëmijët e çerdheve janë testuar negativ. Kjo na lejon që çerdhet Lulevera dhe Buzëqeshja të rihapen pa klasat e testuara. Situata është e menaxhueshme. Ju lutemi për distancë dhe maska”, shkruan Ahmeti në Facebook.
Instituti Kombëtar i Shëndetësisë Publike të Kosovës (IKSHPK) ka njoftuar se nga 280 mostra të testuara sot, 29 persona kanë rezultuar pozitivë me COVID-19 në Kosovë, kurse një person është shëruar.
Nga 29 rastet poritive, 13 janë nga Prishtina, 8 nga komuna e Obiliqit, 2 raste komuna e Vushtrrisë dhe nga 1 rast Vitia, Prizreni, Istogu, Lipjani, Fushë Kosova dhe Rahoveci. /Telegrafi/
