Kryetari i Komunës së Prishtinës, Shpend Ahmeti, ka thënë se kjo fundjavë fillon me masa shtesë restriktive kundër përhapjes së COVID-19 me vendim të Qeverisë.
Ahmeti, përmes një postimi në Facebook, ka thënë se rritja e madhe dhe e shpejtë e rasteve e ka rënduar edhe më tej situatën epidemiologjike në vend.
Postimi i plotë i Ahmetit:
“Mirëmëngjesi Prishtinë!
Këtë fundjavë po e fillojmë me masa shtesë restriktive kundër përhapjes së #covid19 me vendim të Qeverisë. Rritja e madhe dhe e shpejtë e rasteve e ka rënduar edhe më tej situatën epidemiologjike në vendin tonë. Të gjithë duhet të jemi më të ndërgjegjshëm, ndaj vetes dhe të tjerëve rreth nesh, andaj ju lusim shumë që të vazhdojmë me kujdes të shtuar, në mënyrë që të parandalojmë përhapjen e mëtutjeshme të virusit.
Sepse vetëm #bashkë mund të e tejkalojmë këtë sfidë!
Vazhdoni t’i mbani maskat, dezinfektoni duart dhe mbani distancë!
#prishtina, ka shkruar Ahmeti, përcjell Telegrafi.
Kryeministri i Kosovës, Avdullah Hoti të premten (dje) e miratoi vendimin e Ministrisë së Shëndetësisë për masat e reja kundër coronavirusit.
Ministria e Shëndetësisë e Kosovës mori vendim që nga ora 20:00 e ditës së sotme deri të hënën, në orën 05:00, t’iu ndalohet veprimtaria të gjitha subjekteve afariste dhe bizneseve, me qëllim frenimin e përhapjes së coronavirusit.
Krahas vendimit të sotëm të Qeverisë së Kosovës për masat e veçanta kundër koronavirusit, ministri i Shëndetësisë, Armend Zemaj, mori vendime të veçanta edhe për shtatë komuna të Kosovës – Prishtinën, Fushë Kosovën, Gjilanin, Obiliqin, Gjakovën, Podujevën dhe Shtimen – për ndalimin e hyrje/daljeve të qytetarëve dhe automjeteve private nga sot, ora 20:00, deri të hënën, ora 05:00. /Telegrafi/
