Kryetari aktual i Prishtinës, Shpend Ahmeti (VV), i cili garon në balotazh me Arban Abrashin (LDK) ka thënë se të gjitha ato që thuhen për të sa i përket qëndrimit në një jaht dhe fluturimit me aeroplan luksoz privat – janë shpifje që po bëhen ndaj tij.
Madje, ai ka theksuar se për çështjen e aeroplanit privat ka ngritur një padi ndaj kryetarit të LDK-së, Isa Mustafës.
“Sulmet janë të niveleve më të ulëta. E kam paditur Isa Mustafën për aeroplanin privat dhe ai duhet të tregojë për këtë. Kurrë me aeroplan privat nuk kam shkuar në lojë. Ai tash duhet ta shpjegojë se për çfarë aeroplani privat ka folur”, tha Ahmeti, njofton Klan Kosova.
“Them se askush nuk mund të ngrejë gisht si e kam konsideruar paranë publike dhe si e kam jetën. E kam një jetë modeste dhe gjithmonë kam jetuar kështu. Edhe në familje e kemi pasur një banesë të vogël, por kemi qenë të lumtur. I kam punët më keq financiarisht, por jam më i pasur shpirtërisht”.
Ahmeti ka thënë se gjitha ato që thuhen janë sulme ndaj tij.
“Kam thënë se xhipi i kryetarit të Komunës, si shpenzim publik, është i keq. Nuk mundet kryeqyteti më i varfër në Evropë ta ketë kryetarin me veturën më të shtrenjtë në Evropë”, tha kandidati i VV-së për kryetar të Prishtinës. /Klan Kosova/