Ai ka thënë se, porositë nga ai takim, duhet të japin inkurajim të fortë për gjetjen e një kompromisi për statusin e ardhshëm të Kosovës, duke shtuar se, përkundër faktit se nuk është optimist i madh, “një fije shprese megjithatë ekziston”.
"Thënë sinqerisht, nuk jam optimist i madh, mirëpo një fije shprese ekziston. Situata edhe më tutje është e rëndë pasi që pozicionet janë diametralisht të kundërta. Tash megjithatë fillojnë bisedimet direkte”, ka thënë Kharchenko, për gazetën serbe “Veçernje Novosti”.
Ai ka shpjeguar se është vënë një bashkëpunim i mirë në kuadër të treshes ndërmjetësuese, që përbëhet edhe nga Wolfgang Ischinger (BE) dhe Frank Wisner (SHBA), duke shtuar se, disa nuanca ekzistojnë, pasi që anëtaret e treshes janë unik kur bëhet fjalë për gjërat e rëndësishme, sepse qysh në fillim kanë krijuar “një bazë të mirë”.
"Kjo nuk ka qenë punë e lehtë. Gjatë verës kanë ekzistuar dallimet e mëdha në Këshillin e Sigurimit. Jemi pajtuar se ekziston interesi i përgjithshëm në Grupin e Kontaktit – dhe ai është, që të arrihet një zgjidhje kompromisi në mes të serbëve dhe shqiptarëve”, ka thënë më tutje Kharchenko.
Lidhur me deklaratat se – 10 dhjetori është fundi i bisedimeve për Kosovën – ndërmjetësi rus ka shpjeguar se askund nuk shkruan që bisedimet përfundojnë atë ditë.
"Procesi i Kosovës po zhvillohet në kuadër të OKB-së, prandaj nuk duhet marrë parasysh deklaratat tjera. Treshja atë ditë duhet ta paraqes raportin, ndërsa është e qartë se fati i bisedimeve të mëtutjeshme varet nga rezultatet konkrete që do të arrihen gjatë muajve në vijim. Megjithatë, nuk duhet marrë parasysh deklaratat të tjera, pasi që Këshilli i Sigurimit është ai, që do ta sjellë vendimin përfundimtar”, ka shtuar ai.