Agjencitë perëndimore të sigurisë kanë konkluduar privatisht se lideri rus i opozitës Alexei Navalny u helmua nga agjencia spiune e vendit FSB, duke drejtuar gishtin nga Kremlini për urdhërimin e sulmit.
Sipas The Guardian, përcjell Telegrafi, përfundimi i zymtë është ndarë midis Londrës, Berlinit dhe Parisit, ndër të tjera, dhe mbështet vendimin këtë javë nga Britania e Madhe dhe BE për të synuar shefin e FSB, Alexander Bortnikov, me sanksione.
Ndryshe, udhëheqësit evropianë kanë qenë të shpejtë për të akuzuar shtetin rus si përgjegjës për helmimin e Navalny në gusht, por mbeten të gatshëm të fajësojnë qartë agjencinë që ata besojnë se është përgjegjëse ose vetë presidentin Vladimir Putin.
Burimet perëndimore të sigurisë, megjithatë, janë të sigurt për akuzimin e FSB-së privatisht, megjithëse pohimi është i vështirë për t’u provuar.
Kremlini ka mohuar vazhdimisht çdo përfshirje duke ofruar madje edhe shpjegime të ndryshme për sëmundjen e Navalny, duke përfshirë një pretendim se ai helmoi veten si një marifet publiciteti.
Navalny nuk ishte ndier mirë më 20 gusht ndërsa ishte në një fluturim nga Tomsk për në Moskë.
Ai ra në koma dhe avioni bëri një ulje emergjente në Omsk. Më pas ai u dërgua në Berlin tre ditë më vonë për trajtim urgjent dhe që atëherë ka bërë një shërim të pjesshëm.
Lideri i opozitës e ka akuzuar Putinin si njeriun “prapa krimit”.
Në një intervistë të fundit ai tha se vetëm dy agjenci ruse mund ta kishin kryer atë – FSB e Bortnikov ose shërbimi i inteligjencës së huaj SVR, i drejtuar nga Sergei Naryshkin.
“Kjo u bë, natyrisht, absolutisht, sipas urdhrave të Putinit”, kishte thënë ai. /Telegrafi/