Gati gjithçka që bën Agjencia e Inteligjencës së Kosovës e në disa fusha edhe më shumë se aq, do ta ketë në mandat institucioni i ri që po synon të themelohet, që është Agjencia e Inteligjencës ushtarake.
Javën e kaluar Qeveria e Kosovës, një vit pasi e kishte vendosur në konsultim publik, e ka miratuar Projektligjin për Agjencinë e Inteligjencës dhe Sigurisë së Mbrojtjes.
AISM, që është akronimi i këtij institucioni, fokusin do ta ketë në zbulim dhe kundërzbulim të kërcënimeve dhe rreziqeve ndaj FSK-së e Ministrisë së Mbrojtjes.
Një detyrë më shumë në fushë veprimtari sesa AKI-ja, do të ketë ky shërbim, i cili përmes ministrit të Mbrojtjes, është i obliguar që të gjitha informatat inteligjente t’i përcjellë në formë të shkruar brenda 5 ditësh tek Kryeministri dhe Presidenti i Kosovës.
“Me fokus jashtë vendit, grumbullon, analizon, përpunon dhe vlerëson informacione për ushtritë dhe sistemet mbrojtëse të vendeve të tjera, për presionet e jashtme të cilat mund të ndikojnë ose rrezikojnë sigurinë e mbrojtjes dhe për aktivitetet ndërkombëtare të drejtuara kundër sigurisë së mbrojtjes së Republikës së Kosovës”, thuhet në Projektligjin për AISM-në.
Sikurse punëtorët e AKI-së, edhe ata të AISM-së për qëllim të punës së tyre, mund të përdorin identitet të dyfishtë, të kryejnë përgjime por sikurse në rastin e AKI-së kur kjo bëhet tek vendet e personat jopublik, nevojitet një autorizim nga një gjykatës i Gjykatës Supreme.
Të gjitha informacionet që mblidhen por që nuk janë në fushëveprimtari të ASIM-së, do t’i dorëzohen AKI-së ose në raste kur mund të ketë elemente të veprave penale, Policisë së Kosovës.
“Kur AISM, gjatë ushtrimit të veprimtarisë së vet, has në informacione që ndërlidhen me sigurinë nacionale e që nuk kanë të bëjnë me misionin kushtetues dhe ligjor të MM dhe FSK, atëherë këto informacione duhet ti dërgohen AKI-së”, thuhet në Projektligjin për AISM-në.
Pos ministrit të Mbrojtjes, kompetencë për mbikëqyrje do të ketë Komisioni parlamentar për çështje të Sigurisë dhe Mbrojtjes, i cili në raportim mund ta ftojë edhe minsitrin por edhe Drejtorin e Agjencisë së Inteligjencës dhe Sigurisë së Mbrojtjes.
Pjesëtarët e këtij institucioni do të jenë vetëm ushtarak të FSK-së, pos personelit civilë, kurse numri është konfidencial, ashtu sikurse ata do të rekrutohen me konkurs të brendshëm.
Punëtorët e AISM-së do ta kenë të ndaluar me ligj që pas largimit të punojnë për organizata apo qeveri të huaja pa miratim nga ky institucion./RTVDukagjini/