Mbi kryetarin e Partisë së Drejtësisë, Ferid Agani rëndon aktakuza për rastin “Stenda”, ku ai akuzohet për shkak të veprës penale “keqpërdorim i pozitës apo autoritetit zyrtar”.
Pas ngritjes së aktakuzës ai kishte dhënë dorëheqje nga pozita e ministrit, por jo edhe nga ajo e kryetarit të partisë prej ku po i shërben koalicionit qeverisës me PDK-në e LDK-në, sidomos për çështjen e Demarkacionit me Malin e Zi.
Me kërkesën e tij të hënën është tentuar të mbahet një mbledhje e Kryesisë së PD-së, për të marrë qëndrim për votim ‘pro’ Demarkacionit nga deputetja Labinotë Demi – Murtezi, mirëpo kjo mbledhje ka dështuar pasi që Agani nuk ka arritur ta bëjë kuorumin e Kryesisë.
“Edhe pse deputetja jonë në Kuvendin e Kosovës, Labinotë Demi – Murtezi, është deklaruar publikisht se do të votoj kundër demarkacionit me Malin e Zi në versionin e tashëm, kryetari Agani ka thirr një mbledhje të Kryesisë për të marrë qëndrim partia për këtë dhe rrjedhimisht për t’i bërë presion deputetes. Mirëpo, shumica e anëtarët të kryesisë e kanë bojkotuar këtë mbledhje dhe nuk ka pasur kuorum për t’u mbajtur”, thotë një burim i Telegrafit nga PD-ja.
Telegrafi mëson se as deputetja Labinotë Demi – Murtezi nuk ka shkuar në mbledhje e djeshme të thirrur nga Agani.
Telegrafi ka provuar të kontaktojë me deputeten Demi rreth kësaj çështje, mirëpo kontakti me të ka qenë i pamundur.
Ky veprim i Ferid Aganit bëhet vetëm disa ditë para se gjykata ta mbajë seancën e shqyrtimit fillestar, ku pritet të kërkohet që lënda e Aganit të ndahet nga lënda e të akuzuarve të tjerë.
Partia e Drejtësisë më parë kishte marrë qëndrim që të mbetet në vullnetin e deputetes Labinotë Demi – Murtezi votimi për çështjen e demarkacionit me Malin e Zi, por që i ishte rekomanduar të ketë vëmendje të shtuar dhe t’i analizoj të gjitha faktet./Telegrafi/