Kur u shpërnda fotografia e aeroplanit të kompanisë arabe Emirates, që dukej se ishte mbuluar prej diamanteve, nuk është e habitshme që përdoruesit e internetit mbetën të mahnitur.
Imazhi e shfaqte një Boeing 777 në një aeroport të Dubait, me atë që duket sikur ka marrë një ndryshim të çmueshëm për festat e fundvitit, transmeton Telegrafi.
Por, duket se jo gjithçka është si duket – e tëra është rezultat i një editimi shumë të zgjuar me Photoshop.
Ka qenë Sara Shakeel e cila e përpunoi imazhin, pasi ta ketë shkrepur derisa po udhëtonte për në Milano të Italisë.
Ish-dentistja e njohur për editime të tilla, e ka postuar imazhin në llogarinë e saj në Instagram dhe nuk kaloi gjatë, që të bëhet virale.
“A është e vërtetë apo jam në ëndërr, dua të fluturoj me këtë aeroplan për në pushime”, ka qenë një prej pyetjeve të shumta.
Meqenëse shumë njerëz nuk besonin se është e edituar, Shakeel ka konfirmuar se gjithçka u ndryshua prej saj. /Telegrafi/