Konferenca e presidentit Hashim Thaçi e paraparë për sot është shtyrë për ditën e hënë në orën 20:00.
Kjo u bë e ditur nga Zyra e Presidentit, përmes një komunikate për media.
Ky pritet të jetë adresimi i tij i parë pas njoftimit të Zyrës së Prokurorit të Specializuar se më 24 prill u ka dërguar Dhomave të Specializuara të Kosovës, me seli në Hagë, një aktakuzë me dhjetë pika për shqyrtim, në të cilën presidenti i Kosovës, Hashim Thaçi, kryetari i Partisë Demokratike të Kosovës, Kadri Veseli dhe të tjerë, akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura.
Thaçi ka qenë jashtë Kosovës dhe ka ndërprerë udhëtimin drejt Shteteve të Bashkuara, ku pritej të mbahej takimi në mes të delegacionit të Kosovës dhe Serbisë për rifillimin e dialogut, me ndërmjetësim të ambasadorit Richard Grenell, njofton Telegrafi.
Ai të premten njoftoi se ka ateruar në Aeroportin e Tiranës.
“Sapo kam zbritur në Aeroportin “Nëna Terezë” në Tiranë, ndërkaq, të dielën në mbrëmje do t’ju drejtohem me një fjalë nga zyra ime.Ju uroj një fundjavë të qetë dhe mbetem me shpresë të plotë se ditët më të mira për Kosovën dhe kombin shqiptar i kemi përpara”, kishte shkruar ai në Facebook.
Ndërkaq, i dërguari i posaçëm i për dialogun Kosovë-Serbi, Richard Grenell, njoftoi se ky takim i paraparë mes përfaqësuesve të Kosovës dhe Serbisë do të ricaktohet.
“Faleminderit, Kryeministri Hoti. Ne e kuptojmë vendimin tuaj dhe mezi presim të ri-caktojmë takimin e ri së shpejti”, ka shkruar Grenell.
Për aktakuzën e Speciales pati reagime të ndryshme nga OVL e UÇK-së, deputetë, po ashtu edhe nga shoqëria civile.